వస్తోంది కొలువుల బండి.. నిరుద్యోగులూ సిద్ధం కండి..
రైల్వేలో కొలువుల జాతర2,25,823 కానిస్టేబుల్‌ పోస్టుల భర్తీ
రెండు దశల్లో ఎంపిక ప్రక్రియ పదో తరగతి ఉత్తీర్ణతే అర్హత
18-25 ఏళ్ల అభ్యర్థులకు అవకాశం అతిత్వరలో నోటిఫికేషన్‌ ప్రకటన
హైదరాబాద్:
దేశంలోని అతిపెద్ద రంగమైన భారత రైల్వేశాఖలో కొలువుల జాతర మొదలైంది. రైల్వే ప్రొటక్షన్‌ ఫోర్స్‌(ఆర్పీఎఫ్) విభాగంలో అతిపెద్ద ఉద్యోగ నోటిఫికేషన్‌ను విడుదల చేసేందుకు కేంద్ర ప్రభుత్వం ప్రణాళిక సిద్ధం చేసింది. దేశవ్యాప్తంగా 2లక్షల25వేల823 ఆర్పీఎఫ్ కానిస్టేబుల్‌ పోస్టులను భర్తీ చేసేందుకు రంగం సిద్ధమైంది. ఇప్పటికే రైల్వే శాఖలో అవసరమున్న సిబ్బంది వివరాలను సేకరించి.. మొత్తం భర్తీ చేసేందుకు కేంద్రప్రభుత్వం సంసిద్ధతతో ఉంది. దీంతో నిరుద్యోగ అభ్యర్థుల్లో హర్షాతిరేకాలు వెల్లువెత్తుతున్నాయి. ప్రత్యేక రాష్ట్రం ఏర్పడి మూడేళ్లు గడుస్తున్నా... నేటికీ రాష్ట్రంలో ఉద్యోగాల భర్తీ ఊసే లేకపోవడంతో ఏళ్ల తరబడి ఉద్యోగాల కోసం ఎదురుచూస్తున్న అభ్యర్థుల ఆశలు అడియాశలుగానే మిగిలాయి. కేంద్ర ప్రభుత్వం అతిత్వరలో ఉద్యోగ ప్రకటన చేయనుండడంతో అభ్యర్థులు రెట్టింపు ఉత్సాహంతో సాధన చేసేందుకు పోటీ పడుతున్నారు. దేశ వ్యాప్తంగా ఒకే రిక్రూట్‌మెంట్‌ ఉండటంతో పోటీ కూడా తీవ్రంగా ఉండే అవకాశముంది. గతేడాది కేంద్ర ప్రభుత్వం కేవలం మహిళా కానిస్టేబుళ్ల నియామకానికే నోటిఫికేషన్‌ జారీ చేసింది. ఆ నోటిఫికేషన్‌లో సుమారు 2వేల మంది మహిళా ఆర్పీఎఫ్ సిబ్బందిని నియామకం చేపట్టి విధుల్లోకి తీసుకున్నారు.
రెండు దశల్లో ఎంపిక ప్రక్రియ:
కేంద్ర ప్రభుత్వ సంస్థ రైల్వేశాఖలో ఆర్పీఎఫ్ సిబ్బందిని నియమించేందుకు అధికారులు రెండు దశల్లో ఎంపిక ప్రక్రియను చేపట్టనున్నారు. ఫిజికల్‌ ఎఫిసియెన్సీ టెస్ట్‌ (పీఈటీ), రెండు దశగా రాత పరీక్షను నిర్వహించి.. అర్హత సాధించిన వారికి మెడికల్‌ పరీక్షల అనంతరం విధుల్లోకి తీసుకోనున్నారు. అన్‌రిజర్వ్‌డ్‌, ఓబీసీ కేడెట్లకు ఎత్తు 165.0 సెంటీమీటర్లు, చాతి భాగం 80-85, ఎస్సీ, ఎస్టీ అభ్యర్థులకు ఎత్తు 160.0సెంటిమీటర్లు, చాతి 76.2-81.2 ఉండాలి. అదేవిధంగా మహిళా అభ్యర్థులకు అన్‌రిజర్వ్‌డ్‌ కేటగిరికి 157.0సె.మీ., ఎస్సీ, ఎస్టీ అభ్యర్థులకు 152.సెం.మీ. ఉండాలి. అదేవిధంగా పురుష అభ్యర్థులు 1600మీటర్ల పరుగు పందాన్ని 5నిమిషాల45 సెకన్లలో, హైజంప్‌ 3.9ఫీట్లు (రెండు అవకాశాలు), లాంగ్‌జంప్‌ 14 ఫీట్లు (రెండు అవకాశాలు), మహిళ అభ్యర్థులు 800 మీ. పరుగును 3.40సెకన్లు, హైజంప్‌ 3ఫీట్లు (రెండు అవకాశాలు), లాంగ్‌ జంప్‌ 9 ఫీట్లు (రెండు అవశాలు) ఉంటుంది. అదేవిధంగా రాత పరీక్షలో జనరల్‌ అవేర్‌నెస్‌ (100 మార్కులు) సబ్జెక్టులో కరంట్‌ అఫైర్స్‌, హిస్టరీ, జనరల్‌ సైన్స్‌, మ్యాథమెటిక్స్‌ తదితర అంశాలుంటాయి. ఎస్‌ఏ రైటింగ్‌ విభాగంలో 50మార్కులకు ఏదో ఒక అంశంపై ఇంగ్లీష్‌, హిందీ లాంగ్వేజ్‌లో వ్యాసరూప సమాధానాలు రాయాల్సి ఉంటుంది. జనరల్‌ ఇంగ్లీష్‌ ప్రశ్న పత్రంలో (50మార్కులు) గ్రామర్‌, కరెక్షన్‌ ఆఫ్‌ సెంటేయిన్స్‌, ఇతర అంశాలపై ప్రశ్నలు ఉంటాయి.
అర్హత, కేటగిరి వారీగా ఖాళీలు:
రైల్వేశాఖలో ఆర్పీఎఫ్ ఉద్యోగానికి పదోతరగతి ఉత్తీర్ణత అర్హతగా కేటాయించారు. 18 నుంచి 25 ఏళ్ల వయస్సు ఉన్న అభ్యర్థులు దరఖాస్తు చేసుకోవాల్సి ఉంటుంది. ఎస్సీ, ఎస్టీ అభ్యర్థులకు నోటిఫికేషన్‌లో వయో పరిమితి సడలింపు ఇస్తారు. ఆర్పీఎఫ్ నియామకాల కోసం ప్రస్తుతానికి నోటిఫికేషన్‌ అధికారికంగా విడుదల కానున్నా.. కొలువులను కేటగిరి వారీగా కేటాయించారు. జనరల్‌ కోటాలో 8901, ఎస్సీ విభాగంలో 3317, ఎస్సీ విభాగంలో 3363, ఓబీసీ కేటగిరిలో 4371పోస్టులు దేశవ్యాప్తంగా భర్తీ చేయనున్నారు. 2018 జనవరి నాటికి ఈ పోస్టులను భర్తీ చేసేందుకు కేంద్ర ప్రభుత్వం, రైల్వే రిక్రూట్‌మెంట్‌ బోర్డు సన్నాహాలు మొదలు పెట్టింది. అక్టోబర్‌ 14న చివరి దరఖాస్తు తేదీగా నిర్ణయించినట్లు తెలుస్తుంది.
ఆర్పీఎఫ్ ప్రధాన విధులు:
ఆర్పీఎఫ్ కానిస్టేబుళ్లు రైల్వే శాఖలోని వివిధ పోలీస్‌స్టేషన్ల పరిధిలో పనిచేయాల్సి ఉంటుంది. ముఖ్యంగా రైల్వేఆస్తులు, ప్రయాణికులు, వస్తువులకు రక్షణ కల్పిస్తారు. అదే విధంగా నేరాలు జరగకుండా సివిల్‌ పోలీసుల సమన్వయంతో పనిచేస్తారు. ఎలెక్షన్స్‌, ఎమర్జెన్సీ సమయాల్లో సహాయ సహకారాలు అందించడంలో ప్రత్యేకపాత్ర పోషిస్తారు. అదేవిధంగా రైల్వే ప్రొటెక్టీవ్‌ స్పెషల్‌ ఫోర్స్‌ బెటాలియన్‌ సిబ్బంది మాదిరిగా శిక్షణ పొంది సహాయ కార్యక్రమాలు అందిస్తారు. దీంతోపాటు విపత్తులు, వివిధ సమస్యల తరుణంలో కూడా మెరుగైన సేవలు అందించేందుకు వీరిని వినియోగిస్తారు. వీరి వేతనం 6వ పే కమిషన్‌ ప్రకారం రూ.5200- 20,200 ఉండగా, ప్రస్తుతం 7వ పే కమిషన్‌ ప్రకారం రూ.22వేల నుంచి రూ.25వేల వరకు ఉంటుంది. ఇందుకు సంబంధించిన పూర్తి వివరాలను ‘http://www.indianrailways.gov.in/’ వెబ్‌సైట్‌ను సంప్రదించవచ్చు.
